As ferramentas

 Para traballar cos pés na terra non abonda coas mans. Precisamos ferramentas. Coñeces ben os seus nomes?

AMABUL E AS ESPECIES EXÓTICAS INVASORAS

Esta semana visítanos Rubén para explicarnos o que son as especies exóticas invasoras e como afectan aos nosos bosques e prados, ás beiras dos nosos ríos Moitas veces, sen querer, favorecemos a extensión destas plantas que tan ben se adaptan ao noso clima e deixamos sen espazo ás especies autóctonas, que foron as que fixeron que a nosa paisaxe sexa como é. Para recoñecelas ben deixaron unha colección de paneis exposta no patio cuberto e puidemos practicar compoñendo un crebacabezas de cada especie. 

Ademais, Rubén agasallounos co libro que el escribiu e que xa temos na nosa biblioteca. 

EVA CASTIÑEIRA, COS PÉS NA TERRA

 

Esta muller que vedes aquí chamábase Eva Castiñeira. Vivía en Agranzón, unha aldea moi perto de aquí, coa súa familia. Sempre lle gustou tocar a pandeireta e cantaba moi ben, así que cando había festa tocaba con dúas veciñas mais e a súa propia irmá, Engracia, mentres a xente bailaba. 

Co tempo, Eva emigrou para traballar na Coruña. Vivía nun pequeno lugar chamado San Pedro de Visma, que agora cadra perto do Estadio de Riazor. 

A transmisión oral das cantigas tradicionais tamén forma parte da nosa vida na terra: falan do traballo diario, da relación entre os veciños, do compañeirismo e da amizade. 

Para achegarnos a ela, imos escoitar unha peza gravada hai xa moitos anos. 

"ABELLAS NA ESCOLA" cos pequenos

 Hoxe recibimos a visita de Nico, o apicultor que ven ofrecernos "Abellas na escola". Con el aprendemos como viven as abellas e como traballan. Tamén puidemos gozar dos produtos que fabrican estes bichiños: o mel, o pole e a cera, coa que fixemos candeas. Tedes aquí unha mostra do que pasou.

Primeira visita: "Abellas na escola" ou "Escola de abellas"

 O xoves 26 e o venres 27 desnvolveremos a actividade "Abellas na escola", que nos achegará ao misterioso mundo destes pequenos animaliños tan valiosos para a nosa supervivencia. Poderiamos vivir sen abellas na nosa terra? Para que as necesitamos? 

Premendo na imaxe, terás máis información. 

BOTAMOS A ANDAR... COS PÉS NA TERRA

Xa comezamos o curso e repartimos as nosas parcelas. E quedaron así de xeitosas:

Veremos se este curso as condicións son favorables e chegamos a unha primavera na que poidamos disfrutar dunha boa colleita...